Prospectiva blog

Software asteburu librea antolatu dute asteburu osoan Zarautzko Putzuzulo gaztetxean eta Software librea enpresan gaiari buruz hitz egitera gonbidatu gintuzten.

Gaur arratsalde igandean egon gara bertan eta CodeSyntaxeko esperientzia kontatu dugu. Norbaitek interesa badu, zuzenean erabili izan ez arren, hona hemen jardunaldirako Gari Araolazaren hitzaldi batean oinarrituta, prestatuta neukana . Gutxi gora bera horretaz aritu naiz ni eta Josu Azpillaga lankideak adibide praktikoekin osatu du.

Aurretik, Patxi Gaztelumendik aurkeztutako hitzaldian Iñaki Alegriak Software Librea eta Hezkuntza gaiari buruz hitz egin du.

Eta eguna eta asteburua bukatzeko Richard Stallman, GNU proiektuaren sortzaileak eta software librearen aldeko mugimenduaren erreferente esanguratsuenak Copyright vs Comunidad, en la era de las redes de ordenadores hitzaldia eskaini du. Stallmanen oihartzun mediatikoari jarraituz, leporaino bete da gaztetxea. Bero egiten zuen eta nekatuta zegoen Stallman, hala ere software eta eduki libretaz aritu da ordu t'erdi batean, bukatzeko galdera erantzunak eta, nola ez, kantuak eta bedeinkapenak.

Putzuzolokoek dioten bezala denok daukagu zer ikasia software librearen munduan. Eta denok hasi behar dugu ikasten, pixkanaka. Batzuetan, gainera, desikastea ere beharrezkoa izaten da gero berriz ikasten hasteko. Ni behintzat, ikasten nabil.

Argazki sorta bat hemen

Eguneraketa: Bestalde, Arraio Irratiak zuzenean eman zituen hitzaldiak eta gainera asteburu osoko hitzaldien grabazioak : Librezale, softwarea euskeratu (47:28m); Catix, Katalunyako banaketa askea; EH librea, mahai-ingurua (90:14m); Iñaki Alegria, software askea hezkuntzan; CodeSyntax, software askea enpresetan (41:13m); eta Richard Stallmanen hitzaldia (116:56m)) :eskuragarri ipini ditu hemen .

Technorati Tags: putzuzulo, Zarautz, Software_Librea, CodeSyntax